Farsların Azərbaycanlı Prezidentindən Azərbaycan şeiri ilə yardım istəməsi – KÖŞƏ
Dünən İran İslam Respublikasının Prezidenti Məsud Pezeşkian ölkəmizə səfər etdi. Səfərdən əvvəl və səfər zamanı verdiyi açıqlamalar xüsusi diqqət çəkdi. İran Prezidentinin bəzi fikirləri diplomatik çərçivəyə salınsa da, digərləri sanki yumorik və səmimi görünməyə çalışırdı.
Səfərdən öncə Azərbaycan Dövlət Televiziyasına müsahibəsində Pezeşkian, aparıcının Zəngəzur dəhlizi ilə bağlı sualına diplomatik çalarlarda cavab versə də, bu cavab əslində fars dövlətinin mahiyyətini üzə çıxardı və ölkəsinin mövqeyini açıq şəkildə qorudu. Bu isə əslində təəccüblü deyil. Hər bir şəxs, hansı millətdən olursa-olsun, vəzifəsinin kiçikliyindən və ya böyüklüyündən asılı olmayaraq öz dövlətinin maraqlarını müdafiə etməsi normaldır. İran məmurları arasında olan azərbaycanlıların da bir çoxu bu prinsipə uyğun olaraq, sanki “Roma Papasından daha çox katolik olmaq” misalını rəhbər tutaraq, farslardan daha artıq fars olmağa çalışırlar.
İkinci bir jurnalistin iki ölkə arasında mövcud gərginlik və siyasi ritorika ilə bağlı sualına Pezeşkian yumorla cavab verdi:
"Balaca uşaqların dalaşmasına böyüklər qarışmamalıdır. Balacalar dalaşanda barışır, amma böyüklər dalaşanda barışa bilmirlər."
Bu cavab, hər nə qədər təbəssüm yaratsa da, əslində dərin bir siyasi mesaj daşıyırdı. Bəlkə də bir çoxunuz bunu Prezidentin geri addım atması kimi qiymətləndirdiniz. Ancaq gerçəklik budur ki, İran rəhbərliyi, xüsusilə də Pezeşkian, əvvəlki hökumətin Azərbaycanla yaratdığı ixtilafların nəticələrindən peşmandır. Əvvəlki hakimiyyətin buraxdığı səhvlərin məsuliyyəti bu gün Pezeşkianın üzərinə düşmüş kimidir. O isə bu "hesabı" ya ödəmək, ya da minimum itki ilə çıxmaq üçün yollar axtarır.
Artıq regionda təcrid olunan İranın son ümidi, illərlə öz ayağını qazdıqları güclü Azərbaycan dövləti ola bilər. Pezeşkianın Bakıdakı səfəri zamanı böyük Azərbaycan şairi Məhəmmədhüseyn Şəhriyarın məşhur şeirindən "Burda bir şir darda qalıb, bağırır" misrasını səsləndirməsi də təsadüfi deyildi. Bu bir mesaj idi: İran, sanksiyaların və təzyiqlərin məngənəsində sıxılmış vəziyyətdə, Azərbaycan kimi güclü və nüfuzlu bir dövlətdən yardım istəyirdi. Bu dəfə dini bağlara deyil, milli köklərə istinad edilirdi. Farsların azərbaycanlı Prezidenti bu yardımı azərbaycanlıların xatirinə almağa çalışırdı. Çünki bilirdi ki, Azərbaycan xalqı qapısını döyənə heç zaman arxa çevirməz.
Bəlkə də düşünürsünüz ki, bu fikirlər Pezeşkianın bir azərbaycanlı olaraq daxili təəssübkeşliyinin məhsuludur. Ancaq belə deyil. İranın içində Azərbaycanı yaxşı tanıyan, bu münasibətlərin normallaşmasının vacibliyini anlayan çox sayda fars intellektualı da var. Bu strategiyanın arxasında onların düşüncəsi də dayanır.
Lakin Pezeşkian bilməlidir ki, son sözü nəinki regionun, dünyanın ən güclü və nüfuzlu liderlərindən biri olan Prezident İlham Əliyev deyəcək. Azərbaycan xalqı da öz Prezidentinin dediyinə əməl edəcək. Cənab Prezident necə qərar verərsə, biz də o yolla gedəcəyik. Özünün də dediyi kimi: "Nəyi, necə və nə vaxt etmək lazımdırsa, bunu yalnız möhtərəm Prezidentimiz İlham Əliyev bilir."
//Nəzərbəy Hacıağayev, Strateji.az saytının Baş redaktoru







