Gülnarə Pənahova “Qızların Təhsilinə Dəstək” layihəsinin beşillik yubiley tədbirində iştirak edib
2026-cı il oktyabrın 22-də “Əlilliyə Erkən Yardım Portec Şəbəkəsi” İctimai Birliyinin sədri Gülnarə Pənahova “Qızların Təhsilinə Dəstək” layihəsinin beşillik yubileyinə həsr olunmuş tədbirdə iştirak edib.
Ailə, Qadın və Uşaq Problemləri üzrə Dövlət Komitəsinin təşkilatçılığı, Elm və Təhsil Nazirliyi və Təhsilin İnkişafı Fondunun tərəfdaşlığı ilə keçirilən tədbirdə layihənin beşillik fəaliyyəti, əldə olunan nəticələr və qızların təhsil imkanlarının genişləndirilməsi istiqamətində görülən işlər diqqətə çatdırılıb.
Tədbirdə çıxış edən rəsmi şəxslər qızların təhsil almasının cəmiyyətin inkişafı, insan kapitalının gücləndirilməsi və gələcək nəsillərin rifahı baxımından əhəmiyyətini vurğulayıblar. Layihənin qızların bilik və bacarıqlarının inkişafına, potensiallarının üzə çıxarılmasına və təhsildə bərabər imkanların təşviqinə verdiyi töhfələr qeyd olunub.
Proqram çərçivəsində layihənin beşillik fəaliyyətini əks etdirən film nümayiş etdirilib, təqaüd proqramının iştirakçıları öz təcrübələrini bölüşüblər. Tədbir bədii proqramla başa çatıb.
“Əlilliyə Erkən Yardım Portec Şəbəkəsi” İctimai Birliyi təhsilin əlçatanlığının artırılmasını, bərabər imkanların təşviqini və həssas qrupların cəmiyyət həyatında fəal iştirakını dəstəkləyən təşəbbüsləri əhəmiyyətli hesab edir.






