Neft Akademiyasının Kollecində zərərli vərdişlər və asılılığın profilaktikası mövzusunda təlim keçirilib
Neft Akademiyasının Kollecində “Narkotik maddələr, zərərli video oyunlar və digər pis vərdişlərə asılılıq problemində ailələrin rolu, valideyn məsuliyyəti və maarifləndirmənin əhəmiyyəti” mövzusunda maarifləndirici təlim keçirilib.
Kollec rəhbərliyinin təşkilatçılığı və dəvəti ilə baş tutan təlimdə “Peşəkar Psixoloqlar” İctimai Birliyinin sədri Səbinə İsmayılova və İdarə üzüvləri Səltənət Həsənova, Ülkər Zülfüqarova çıxış ediblər.
Təlim zamanı yeniyetmə və gənclər arasında asılılıq riskləri, ailə mühitinin davranışlara təsiri, valideyn nəzarətinin və emosional dəstəyin əhəmiyyəti, düzgün ünsiyyət və problemlərə erkən müdaxilənin vacibliyi barədə məlumat verilib.
Çıxışlarda həmçinin ailənin asılılıq problemlərinin qarşısının alınmasında və mövcud çətinliklərin aradan qaldırılmasında rolu müzakirə olunub. 24 saylı Mediasiya Təşkilatının rəhbəri, mediator Ülkər Zülfüqarova, eləcə də 20 saylı Mediasiya Təşkilatının mediatorları Səltənət Həsənova və Səbinə İsmayılova narkotik asılılığı ilə bağlı ailədaxili münasibətlər, problemin sağlam və konstruktiv yollarla həlli barədə fikirlərini bölüşüblər.
Təlimin əsas məqsədi gənclərin sağlam inkişafına dəstək göstərmək, valideynlərin və ailələrin bu sahədə məlumatlılığını artırmaq, zərərli vərdişlərə və asılılığa qarşı profilaktik yanaşmanı təşviq etmək olub.
“Peşəkar Psixoloqlar” İctimai Birliyi bu istiqamətdə maarifləndirmə tədbirlərinin keçirilməsini cəmiyyətin psixoloji sağlamlığının və ailə institutunun gücləndirilməsi baxımından vacib hesab edir.






