PASHA HACKATHON: Qızlar texnologiya ilə dünyanı dəyişirlər

 Bu gün rəqəmsal texnologiyalar daha da dayanıqlı şəkildə dünyanın yenidən qurulmasında mühüm vasitə olmağa başlayıb və dünyada rəqəmsal texnologiyalar, İT həllərdə qadınların rolu böyükdür.

İnnovativ məhsullar yaratmaq məqsədilə, Azərbaycanın ən böyük 48 saatlıq texnologiya yarışmalarından biri olan “Pasha Holding” tərəfindən dəstəklənən, “Pasha Pay” və “Hackquarters by Tenity” təşkilatçılığı ilə 28-29-30 iyun 2024-cü il tarixlərində Bakıdan keçirilən “Pasha Hackathon 4.0” başa çatdı. SOCAR-ın Bakı Ali Neft Məktəbinin (BANM) “Untitled” komandası birinci yerin qalibi olaraq 6000 manat qazandı. Bu güclü komandanın və 2-ci yer qalibi komandanın hər birində qiz iştirakçılar da yer almışdı.

Bəli, mən də Aygün Əhmədova, Azərbaycanın ən böyük texnologiya yarışması olan “Pasha Hackathon” ailəsinə, 2-ci dəfərdir ki, mentor kimi qatılırdım. İlk Hackathon mentorluğum “Pasha Hackathon 2.0” idi və hələdə o coşqulu, gənc beyinləri xatırlayıram. Və hackathonda mentor kimi roluma görə Sabina Babayevaya təşəkkür edirəm.

Bu dəfə “Pasha Hackathon 4.0”-də diqqətimi daha çox ən önəmli məqamlardan, ildən ilə artan iştirakçı sayı və xüsusilə iştirakçılar arasında komandaların əsas üzvlərinin qız iştirakçılar olması idi. Hətta münsiflər heyəti, mentor və ekspertlərin də əksəriyyəti qadınlar idi. Təbii ki, qadın olaraq və qadınlarla çalışan bir qadın lider olaraq, bu hadisə məni hədsiz sevindirdi. Hətta, bu sevincimi təşkilatçılarla bölüşdüm, təşəkür etdim və bu yazını yazmaq qərarına gəldim.

Mentorluq etdiyim bütün komandaların tərkibindəki oğlan və qizlarla söhbət və disskusiyalarımızda, oğlan iştirakçılarının “qızlar texnologiyanın dəyişiklik üçün güclü bir vasitə olduğunu bilən və ondan sosial rifah üçün istifadə etmək istəyən, maraqlı, çevik və yaradıcı problem həlledicləridir”, “dərin texnologiya təcrübələri olmayanlar belə, öyrənməyə hədəflidirlər”, “qızlar daha yaradıcıdırlar və yeni yanaşmalar əlavə edə bilirlər” kimi fikirlər eşidirdim. Hətta qız iştirakçılardan biri belə demişdi: “Mən indi gələcəyimi elə planlaşdırıram ki, etdiyim hər şey texnologiya vasitəsilə olacaq. Çox ideya və planlarım var. Mən proqramlaşdırma ilə çox yaxından maraqlanıram və öyrənirəm. Bu yarışma bizə 3 gün boyunca necə çevik və dəqiq çalışa biləcəyimizi öyrədir.”

Çox şadam ki, ölkəmizdə qadınların İKT sahəsində rolu günü-gündən genişləndirilir, bu istiqamətdə gender bərabərliyi təmin edilir. Bütün bunlar, gənc qızları innovasiyalara yaxından maraq göstərməyə, texnologiyalar sahəsində peşə seçimi etməyə və öz karyeralarını bu sahədə qurmağa sövq edir. Bu gün Pasha Hackathon və digər layihələrdə bu aydın görünür.

Onu da qeyd edim ki, rəhbəri olduğum “Magen David International Center for Women” nin nümayəndələrinin və təsisçisi olduğum “Qadınların İnkişafına və Maarifləndirilməsinə Dəstək” İctimai Birliyinin əsas idarə heyəti üzvləri içərisində, qadın təsisçilər tərəfindən yaradılan İKT, proqramlaşdırma məktəbinin (Maestro School) rəhbərliyi də təmsil olunur. Birlikdə qadınlar və qizlar üçün rəqəmsallaşdırma, və digər adiyyəti sahə ilə bağlı bir sıra layihələr təşkil edirik. Və bu qadınlar informasiya cəmiyyətinin və rəqəmsal iqtisadiyyatın inkişafında fəal iştirak edirlər.

Onu da qeyd etmək istəyirəm ki, BMT Nizamnaməsində kişilər və qadınlar arasında bərabərlik insan hüquqlarından və BMT-nin Minilliyin İnkişaf Məqsədlərinin əsas vəzifələrindən biridir və İKT bu məqsədə nail olmaq üçün irəliləyişi sürətləndirməyə kömək edən bir vasitədir. Məhz buna görə Beynəlxalq Telekommunikasiya İttifaqı (BTİ) Şurası yeni rəqəmsal imkanların göstərilməsi üçün İKT-nin bütün gücündən istifadə edərək ayrı-seçkiliyə son qoymaq və qadın və qızlara dünyada haqlı olaraq layiq olduqları yeri tutmağa imkan verən məsələləri ortaya qoyur.

Gənclərə texnologiyanın imkanlarını araşdırmağa, onlara yeni bacarıqlar və səriştələr verən, real dünya problemlərini həll etmək üçün onlara güc bəxş edən və şüurlarını yeni imkanlara açmağa kömək edən Pasha Holdingin dəstəyi ilə keçirilən Pasha Hackathon komandasına uğurlar arzulayıram.

Direktor, Magen David International Center for Women

Aygün Əhmədova