Hacı Əliyevdən vida PAYLAŞIMI

 Sərbəst güləşçi Hacı Əliyev (65 kq) peşəkar karyerasını başa vurub.

İdman.biz xəbər verir ki, o bu barədə sosial şəbəkədə paylaşım edib.

"Bu da son" başlığı ilə edilən paylaşımda hər kəsə təşəkkür edib: "Əziz doğma xalqım. Artıq uzun illərdir ki, çoxlu qələbələr gətirmişəm. Hər dəfə qələbə qazanıb bayrağımızı ən zirvələrə qaldırmaq və himnimizi səsləndirmək mənim üçün böyü şərəf olub. Çox sevinirəm ki, Allah mənə həyatda bu qədər qələbələr nəsib etdi, məni yüksəltdi, məni ölkəmə və dünyaya tanıtdı. Birvaxtlar atasının əlindən tutub güləşə gedən Hacı haradan bilərdi ki, bu qədər qələbələr qazanıb tarix yazacaq. Qazandığım bu qələbələr tək mənim yox, bütün Azərbaycan xalqının qələbəsi olub. Güləş karyeram ərzində o qədər medal qazandım ki, cənab Prezidentimiz İlham Əlievin dediyi kimi "sənin nə qədər medalın var bəlkə özün də bilmirsən. Bu doğurdan da belədir. Mənə bu günə qədər dəstək olan hər kəsə təşəkkür edirəm".

Hacı 3 qat dünya və 4 qat Avropa çempionu olub. O, Rio-2016 Olimpiadasında bürünc, Tokio-2020-də isə gümüş medal qazanıb.

Qeyd edək ki, Hacı Əliyev Paris-2024 Olimpiadasında 1/4 finalda çıxışını başa vurub.