Azərbaycan Şahmat Federasiyası 2025-ci ilin təqvimini təsdiqləyib

 Azərbaycan Şahmat Federasiyası 2025-ci ilin təqvimini təsdiqləyib. Azərbaycan çempionatında yüksək rəqabətin yaranması və milli üzvlərinin o cümlədən yığmaya namizədlərin yarışda iştirakının təmin edilməsi üçün aparıcı şahmatçılarla müzakirələrdən sonra yeni reqlament seçilib.
Beləliklə Azərbaycan Şahmat Federasiyası növbəti yarış ilinin təqvimini və 2025-ci ildə təşkil olunacaq Azərbaycan çempionatının əsasnaməsini təqdim edir. Bu amil zəka sahiblərinə qatılacaqları yarışların siyahısını rahatlıqla tərtib etməyə, ölkə çempionatlarında iştirak etmək və hazırlıq proqramını düzgün formalaşdırmağa kömək edəcək. 
2025-ci ildə kişilər və qadınlar arasında Azərbaycan çempionatı 31 yanvar – 15 fevral aralığında keçiriləcək. Kişilərin yarışına milli komandanın üzvləri, son Azərbaycan çempionatının yarımfinalçıları, FIDE reytinqinə əsasən ən yüksək reytinqli şahmatçılar (14 iştirakçı) və I dəstədə yüksək nəticə göstərən 5 şahmatçı buraxılacaq. 
Qadınların yarışında millinin üzvləri, son ölkə çempionu, FIDE reytinqinə əsasən ən yüksək reytinqli 8 azərbaycanlı şahmatçı və I dəstədə yüksək nəticə göstərən 2 iştirakçı mübarizə aparacaq. 
Azərbaycan çempionatı olimpiya sistemi üzrə təşkil ediləcək. Turnir FIDE qaydalarına əsasən keçiriləcək və 5 turdan ibarət olacaq. Turun hər bir matçı 2 klassik partiyadan (ağ-qara) və burada qeydı alına biləcək bərabərlik halında tay-breklərdən ibarətdir. Nəzərinizə çatdırmaq istərdik ki, iştirakçıların qeydiyyatı 9-16 oktyabr 2024-cü il tarixlərində aparılacaq. 
AŞF həmçinin Azərbaycan çempionatları tarixində rekord sayılacaq mükafat fondu təyin edib. Kişilərin yarışında 60 min, qadınların çempionatında isə 30 min manat mükafat fondu olacaq. Mübarizəni daha maraqlı etmək üçün klassik partiyada tay-brek olmadan mərhələ adlayan şahmatçının hər biri əlavə bonus - pul mükafatı qazanacaq. Azərbaycan çempionatının qalibi olacaq şahmatçı milli komandaya vəsiqə qazanacaq. 
Yeni reqlamentin əsas məqsədi Azərbaycan çempionatında ölkənin ən güclü şahmatçılarının iştirakını təmin etməkdir.  
Qeyd edək ki, 2025-ci ilin yarış təqvimi artıq AŞF-nin rəsmi saytında yerləşdirilib.